Anmwe! Boulva

Freedom of Expression

Inyorans, Anbisyon, ap detri Konpa

Posted by Anmwe Sekou
Anmwe Sekou
Anmwe Sekou has not set their biography yet
User is currently offline
on Friday, 13 January 2012 in Music

 

 

Se ki sa k'ap pase nan konpa konsa? Se yon kesyon anpil moun ap poze, men pa janm gen yon repons pou li. Ebyen se menm sa ki rive tout prodwi Ayiti te konn fè se sa k'ap pase nan konpa. Konpa pa sèlman ap pèdi fèy konnya, se rasin li k'ap pouri. Djaz ki kenbe bon strikti konpa dirèk lan moun yo pa ale ladan ankò. 

Moun k'ap tande mizik se menm jan ak yon ti moun k'ap grandi. L'angaj li jwenn moun bò kote li an ap pale se li k'ap fè sans pou yo. Ou rive an Ayiti, se ki mizik radio, disko,  ap jwe, se  Merenge, salsa, Rap Ameriken, R&B, zouk, rap kreyòl, rege. Tout  mizik sa yo n'ap di la pa gen anyen pou wè avèk kilti Ayisyen an. Anpil radio itilize sa kòm yon strateji pou jwe mizik etranje tanke konpa, rezon pou sa se yon fason pou Djaz oubyen Atis Ayisyen peye yo pou yo jwe mizik yo. Tout moun ka konprann sa a, fò ke yo jwenn yon fason pou yo fè lajan pou yo ka sipòte radio an, ak tout moun k'ap travay ladan. Men pandan tout sa ap fèt Konpa menm ap pèdi valè. Sa gen yon bon 10 ane epidemi disko antiyè tonbe Miami, kote Didje ap jwe sèlman zouk, salsa, merenge. Ak 10 dola ou antre nan disko an, plen moun la dan, ou danse, tandiske nan ou ale nan yon bal w'ap peye 30 dola an avans, nan pòt lan 40 jiska 50 dola, tout sa travay kont Konpa.

Promotè, Didje, Prodisè, Manadjè djaz, manb djaz, vin trò saf, yo mete lajan an premye san ke yo p'ap mete bon prodwi deyò. Si n'ap swiv denye albòm tout djaz yo se kèk nan yo ou ka di ki gen potansyèl. Sa ki gen potansyèl pa gen promosyon ki fèt pou yo. Youtube ak Facebook se la tout djaz, ak atis fè promosyon. Sa yo pa panse si ou gen 5000 zanmi sou Facebook ou pataje yon lyen se konbyen nan yo ou panse ki klike sou lyen sa, si'w jwenn 15 klike sou li se chans. Alò konnya ou di w'ap fè promosyon sou Facebook. Si li te fasil konsa Facebook pa t'ap ba ou avantaj pou ou poste lyen.

Ou gen yon seri de lòt atis ki mete yon albòm deyò, yo pran tout albòm nan mete sou Youtube. Sa yo pa panse pa gen mizik ki sou Youtube si yon moun vle telechaje li pa ka telechaje. Men inyorans fè yo pa konn mèyè ke sa. Ou bezwen plis ke Facebook ak Youtube pou fè yon nasyon konn yon prodwi, ou ka itilize yo pou ou kòmanse  men li enpòtan pou jwenn yon lòt fason pou ou promote prodwi ou gen nan men ou an.

Promotè ak Manadjè k'ap fè bal, festival yo ap ankese yo bliye endistri mizik lan. Yo pa mete anyen ki pou ankadre jèn yo k'ap fè mizik. Ekzanp, Sid Florid ki se Miami, Fort Lauderdale, West Palm Beach, pa gen yon radio FM Ayisyen  ki legal, Radio AM yo se achte yo achte lè. Tout Radio Ayisyen ki sou Band FM tout ilegal. Sa ki gen 10, 15 zan depi yo ap fonksyone. 

Se pi gro problèm Ayisyen gen lakay yo, yo pa bay prodwi lakay valè. Ayisyen an Ayiti, se CNN li gade pou li fè nouvèl, se MTV, BET yo gade pou fè mizik. Si nou pa chita panse rapid, se tande nou ap tande Ayisyen te konn jwe Konpa. 

Zouk kouvri Konpa, rele yo frè men ti frè ap nwaye gran frè. Si yon mizik Konpa fèt nan tan sa li pa gen yon ti zouk ladan, li pase inapèsi. Anpil djaz ki gen nouvo albòm deyò an pou yon rezon yo pa konekte ak fanatik yo. Albòm yo fè plis bri avan yo soti ke lè yo soti. Djaz ki fè tizè, sa ki mete "single" deyò, lòt atis etranje ki patisipe nan chante yo, pou yon rezon mizik yo pa rive jwenn fanatik yo. Si pa gen yon chita pale ki fè antre promotè, manadjè djaz, manb djaz, didje, media, Konpa ap disparèt. Li nesesè ke konpa jwe nan radio, disko, radio entènèt, televizyon, piblisite fèt pou li nan tout bagay pou li resisite. Konpa menase li enpòtan pou nou mete ansanm pou nou pou se li devan.

Rate this blog entry
0 votes
Anmwe Sekou has not set their biography yet

Comments